Laglag

Sa pusod ng kawalan
duon kung saan liblib
ang  mga talahib  amorseko
gumamela't bogambilya
nakatingin sa kalangitan
ang isang malungkot  payat na krus
na gawa sa bulok nang sanga
ng punong mangga
hinihintay ang pagdalaw
ng mga kakilala--nakaalaala:
ang pag-aalay ng kandila
ang paghahandog ng mga rosas
nguni't lumipas
ang mga siglo: wala
walang nakaalaala
sa payat na yaong krus
at sa mumunting garapon
na kinahimlaya't pinagsidlan
ng tinuldukang pintig at hininga.