Minsan May Wala

Minsan may tula pero hindi ikaw ang tula.
Maaring ikaw ang taga-ulat, o ikaw ang mulat,
pero hindi ikaw ang tula tulad ng iyong inaakala.
Maaaring bahagi ka lamang ng tula, o minsan
isa ka lamang bula, minsan ikaw ang maysala,
o minsan ikaw ang pinsala, pero hindi ikaw
at hinding hindi ikaw ang tula. Pansinin: may salita
at ang salita ay parang bloke ng birhen na bato
na inagaw sa balakang ng bundok, hindi ikaw ito.
At uulitin ko, hindi ikaw ang tula. Ang tula
ay hindi rin ang salita, minsan nag-aanyo itong
isda, pero ang tula ay higit pa sa isda, higit sa salita.
Kaya hindi rin ito ang tula. Kung may hapag na salat
sa ulam at kanin, uukitin mo ba ang bato
upang maging mesa, dudurugin mo ba ito at
itatabi sa kutsara? Ang isda, mahuhuli mo ba
gamit ang iyong dila? Anong silbi ng salita, at sino
ang tula? Minsan may tula na salat sa hinala,
pero ang tula talaga, sang-ayon sa kanila,
ay mumunting katotohanan sa pagitan ng mga hiwaga.
Sino ang sila at ano ang hiwaga? Ang tula ay alaala,
mga pag-alaala sa di mo makita, ng mga wala.

(pasintabi sa tulang "Minsan, May Tula" ni Marvin Lobos)

Ang Mga Hangal Ng Kapayapaan Sa Kalye Camba, Isang Gabi't Madaling Araw

kamangha-manghang kakayahan ang pagtalunton
sa bituka ng Maynila--ang mga sikot at ikot, baluktot
at simangot ng mga lansangan, eskinita't kalyehon--

at taglay nila ang mapa at inisasyon, ang katutubong
simbuyong hindi magpapabaligtad sa kanilang mga damit,
waring mga manlalayag sa gitna ng walang ngalang karagatan:
makauuwi sa paroroonan, makayayapak sa lupa
nang buo ang sarili at ganap ang mithing lakbayin
ang kapatagan.

---

ang kasaysayan ng Tundo ay nasasalamin sa mga plastik
na nagliliparan sa tuwinang naglalaro ang hangin.
ang kasaysayan nito'y nakabalangkas sa mga berdeng
larawan at letra sa mga hantad na katawan ng mga lalaking
alipin ng kanto at eskinita, ng mga sipol at inuman, ng mga
away at hulagway ng pekpek shorts at pulang lipistik.
ang kasaysayan ng Tundo ay kasaysayan sa baluktot
nitong kahulugan sa mga pahina ng diyaryo at telebisyon.
ang kasaysayan ay monopolyong inaari ng mga guni-guni
at pagmumuni ng mga makasusugpong ng siglo at milenyo
sa kanilang buong ganid na angkan. pagkat ang kasaysayan
ay kait at said sa ulirat ng nagtakda nitong maliliit:
silang bahagi sa digmaan at pagkawasak,
silang bahagi ng tiwasay
at pagbubuo.

---

sa kanto ng Coral at Quezon St., nag-abang si M upang
aking sunduin (bakit nga ba kung gabi'y kailangan pang
gumayak at magganyak ng alitaptap?)
sa kaunting lakad, makikilala ng iyong talampakan
ang init ng semento
at ang busina ng dyip ay hudyat
ng pagdating. inabangan namin si E sa kanto
ng Pacheco, sa tapat ng Generics Pharmacy.
lantad ang Lantad na paglalantad ng hindi mahubad
na sining sa luntian nitong damit--nagbabadya
ang nag-aabang na samyo ng kapayapaan
sa Kalye Camba, naiinip, naiinip!

---

sino ang dapat sisihin sa kalagayang nagsasadlak sa atin
sa maling panahon, sa maling pagkakataon?

---

ginisang repolyo
talong at bagoong
longganisa
kaning hindi na umaaso
mga plato
kutsara at tinidor
at sikmurang kailangang lamanan

upang ang sabak sa talim
ng alak ay hindi mag-iiwan
ng bangibing larawan sa tabi-tabi:

ang ginisang repolyo
talong at bagoong
longganisa
kaning hindi umaaso
at mga pulutaning
magsasamyo ng pandidiri
sa mga magdaraan.

---

tinotoldahan ang mga bisita sa Tundo:

ang balak na status ni E sa Facebook.

---

ang kapayapaan ay sumakanya,
kay J,
tugon:
at sumainyo rin.
itaas natin ang pamantayan
sa pagkaliyo,
tugon:
itinaas
na namin sa pagbabakasali.

---

walang mukha ang kalungkutan kahit sa rurok nitong anyo,
tulad ng,
walang tinig ang ligayang nakakulong sa sarili.

---

saan umuuwi ang tula
matapos nitong maglakbay?

---

maraming talakay ang inihain at nakain sa ibabaw
ng kuwadradong dilaw na lamesita:

si Charles Bukowski at kung paanong ang henyo
ay hindi henyo at ang henyo'y mananatiling henyo;
ang alak at ang masasamang balak ng kawalan
sa bulsang pinanawan ng laman; si e.e. cummings
at ang kanyang "r-p-o-p-h-e-s-s-a-g-r"; si Sylvia Plath
at ang kanyang maalindog na Confessional style
in the mood of suicidal tendencies; kung paanong
si Ricky ang pinakamahusay na manunulat sa buong
sanlibutan; at ang Agos sa Disyerto'y aagos
at aagos sa kunsaan man nitong mararating kahit
pa sabihin kailangan nang ibaon at hayaan
ang kanilang kamandag sa pahina ng kasaysayan;
ang teorya ay teorya at ang praktika ay teoryang
may patutuguhan; at ang UP ay toreng garing
ng mga mapagpanggap; ang akademya sa sarili
nitong anyo ay bulok na tinapay sa microwave oven;
ang didactic ay di deductive; magica objectiva;
Ars Poetica shitty shit shit sa ipat ni J;
organikong talino ang karanasan; EMR at ang husay;
ang dekada 30 at ang pagsusunog ng mga lumang aklat
Plaza Moriones upang patuluyin ang modernismo;
ang buhay bilang buhay na hulagway ng mga humihingang
mga bagay at ang interkoneksyon ng mga ito sa isa't isa;
self-identifier! self-identify! self! identity!; si M at
ang kanyang pusong ayaw ipanakaw; si E at
ang di matapus-tapos na pagkakalkula ng grado
ng mga mag-aaral; at ako, ang walang kamatayang ako
sa aking daigdig ng tula.

---

inihahatid sa hantungan ang bawat paglalakbay.

---

ang bituka'y may sadyang balangkas upang pakibagayan
ng mga ilalaman at ang mga manunulat at ang kanilang
mga talampaka'y una nang
nakatiyak ng paraan: maglakad pabalik sa umpisa.

---

at naroroon pa rin ang mga kaluluwang hindi pinatutulog ng basura,
tulad ng mga kaluluwang di pagpahingahin ng mga gulong at pedal,
tulad ng mga gulay na nabubulok sa gilid ng bangketa, tulad ng Cluster
Bldg. na mistulang higanteng uling sa pusod ng Divisoria, tulad
ng mga humuhukay ng kayamanan sa burol ng plastik, papel at putik,
tulad ng mga paa kong unti-unti nang sumasakit, tulad ng antok
sa mga mata ni M, tulad ng mga asong tila monghe sa kagubatan
ng lungsod, tulad ng mga nagsisimulang magsimula ng umaga, tulad
mo at tulad nilang nahihimbing pa sa lilim ng liwayway

---

pamamaalam at pagtitiyak ng kaligtasan
ang isa sa dila ng apoy na nagngangalang, pagkakaibigan.

---

pauwi, mag-isa kong tinunton ang kilala ko nang bitukang-lansangan,
bulok at hindi, nitong lupain nina Sakay at Bonifacio, Lualhati at Amado.
at hinding-hindi ako matatakot sa dilim at patalim; ilusyon at haka-haka
ang nakatanim sa iyong realidad.

---

hinihintay ako ng unan, hinihintay ako ng himlayan

at habang nag-iinat na ang umaga,
nagsisimula pa lamang ang aking pahinga.

---

tula ang bula ng malamig na serbesa.

Said

hinahanap ko
ang mga bakas
na iniwan
ng mga talinhagang
umuwi
sa sinapupunan
ng kawalan;

ang natagpuan ko'y sarili
sa bingit
ng mga daliri
--kinakapa'y pakiwari.

Ekis

sampung mga daliri, kamay at paa
dalawampung walang mapala

hindi makatula.

Tula Nang Tula

tutulaan ko
sana ang tula,

Ars Poetica:
ang paraan
ng paglikha,
talinhaga
musika

paano nga ba?

anak ng tinapa!
kumukulo ang tiyan
ng bulalakaw
pabulusok
sa ituktok
ng aking puyo.

Ars Poetica,
tula nang tula

nganga, nakatanga
ang tuod na salita.

ayaw
ko ng/nang gani tu/ong
la.

Cubao-Divisoria: Mga Guni-guni at Pagmumuni

umaangil ang bangibing palahaw ng mga ispiker

sa sagradong himpilan ng Kalayaan

sa kanto ng Anonas at Aurora Boulevard:

ika-apatnapung taon ng pag-aalaala sa paninikil

ng estadong dumildil ng dugo at pawis

sa mga sigwang nag-anyong liyab sa higit-

dekadang paninikil sa tinapay ng salita at pakikibaka:

sa basbas ng garalgal at talakay: nakamasid

ang reyalidad sa lansangan ng katuturan

...

paano gumuguhit ang gintong alak

                                                        sa matapat

na lalamunan ng mga kriminal

ng talinhaga?

halimbawa: ipinatong sa ibabaw? ng at nang?

karapatan... kasapatan? KATAGA?

...

pasumala ang mga salitang pumapailanlang:

hindi kahulugan ng kawalan--

may katuturan ang bawat hiningang tumutunghay

sa landas ng kasaysayan: masdan

ang obrerong himbing sa piling ng asawang tuliro

sa paghahanap ng kanin at ulam;

talakayin ang sikmura

ng nababagot sa botcha at pagpag; suriin

ang hiyaw ng sanidad

sa mga nangangalahig ng pag-asa

sa pusod ng Payatas; 

iguhit sa langit ang kapalaran ng magsasakang

paltos ang paa at inaasam; sumpain ang habilin

ng kalangitan sa hinahamog na balakang

ng matandang hukluban 
sa bansot na kariton--

sampal sa burgis na humpay

ang pag-iral

sa loob ng Kalayaan

...

Ilang talang luma buhat sa talaarawan ng isang may nunal sa talampakan

Manila, My Manila

Mga Kuwento ng Supot sa Panahon ng Kalibugan

Gerilya

Patikim, Emotero

Mondo Marcos

Makata 4 ni Jose Corazon de Jesus

Tinig.com

Alexander Martin Remollino

Pia Montalban

Jack Dison Pablo

Macky Serrano Salvador

Rogelio Ordonez

TAPPM

BLKD

Escopa

Bayan-NCR

Dula

Tula

Arlam Camba

PUP

UP

FEU

Laguna

NCR

Koyang Jess

Escopa

Mcdo

MP

Kamanyang

Yosi

Yelo

Baso

NEVER AGAIN!

NEVER AND NEVER AGAIN!

...

sabi ni Nanik,

                     hindi naman           talaga

masarap         ang alak

kundi               ang kuwentuhan--

ang pagkakataon                      at panahong

nagkasama at          nagkasalo kayo

sa ligid ng                   alak at baso

...

bago humakbang ang mga talampakan sa unang baitang

ng oberpas

sa Cubao, 

animo'y humalik sa lupa

si A,

mistulang paninikluhod sa kairalan ng mga hita at mga labi

ng mga dalaga/dinalaga at nagdalaga

sa malamig na bakal ng oberpas

at isinusumpa ni E ang pagpikit,

na tiyak

ay hudyat ng dire-diretsong

himlayan sa banig at panginip

ako:

humahabi ng hikbi

sa kabibi ng gabi

...

nasaan ang kalayaan sa kasalukuyan?

...

walang                               tula

                   sa dulo

 ng aking                            ng aking

                   daliri

...

tuwid ang daan

ng Aurora Blvd, at malinis ang mukha

ng lansangan na inaawitan

at tinititigan ng dilaw na liwanag 

ng mga poste

matang nakatitig:

pula

luntian

at kahel

na mga talukap

ng traffic lights

humuhugong ang paghihintay ng makina

sa lansangang ikinunukubli sa katwiran

silinyador ng pagbabakasakali

preno ng pagpupunyagi

ilan ang hiningang nagpapahiwatig sa dilim?

          ma

          bi

          lis

          ang

          mga

          pa

          nga

          rap

          at

          a

          li

          tun

          tu

          nin

sa kanto ng J. Figueras at Legarda,

nakatanod ang mga aso sa gitna

ng kalsada,

kinakalinga ng/ang gabi--mga kahol-

sumamo

sa naghihikab,

nahihimbing na Kamaynilaan

nakabantay ang mga barbedwire 

sa kanto ng Mendiola at Recto

sa tapat ng UE,

babaing dumudumi, swak, sa isang asul na lata,

marahil ng gatas

at puwit na singkintab ng panalangin

at pananalig sa lantay

na deklarasyon ng karapatan

at tiwala

sa sanlibutan

mga pulis na nagmamanman sa magagatasan

Aranque'ng sandaling namaalam sa kahayupan

Divisoriang nilukob ng putik

at plastik

na mistulang pananim

sa parang

ng Recto

sa bahagi ng Tutuban patugpa

sa Ilaya at Pier Dos

...

mahabaging diyos

patawarin mo yaring manunula

...

anong saysay ng mga nabanggit?

...

sabi nila:

ang                    tula

ay mga mumunting katotohanan             ukol

sa mga bagay-

                       bagay         sa daigdig

...

saysay at wika?

...

ipikit ang kaluluwa at 

magbubunyi ang mga suwail at halimaw

kaya't huwag,

huwag ipikit, ipiit ang kaluluwa

sa ganito at ganyan

doon at dito

dapat at dapat--

umiilanlang ang hiyaw ng sarili

...

ano ang tula?

Ang Mga Tula

     ...Ang tula
     Ay ikaw
     At akong
     Lumaya na sa berso,

     Nagpakatao.

     Ang Tula, Pia Montalban


ang mga tula ay libong hibla ng buhok
itim at puti at dilaw at pula
na nalagas mulang anit at sumakay
sa mabigat na balikat nang mahampas
ng batuta ng maangas na pulis
ang mga tula ay noong ginuhitan
ng mga gatlang sumasalo ng pawis
bago maglandas sa talukap ng mata
at tungko ng ilong
habang nakatitig ang katanghaliang-araw
ang mga tula ay pisnging walang rosas
ang mga tula ay labing matatabil
at dilang matalas
ang mga tula ay taingang
sumasagap ng balita sa ilalim ng lupa
o sa kalamnan ng langit
ang mga tula ay brasong handang bumangga
sa truncheon
ang mga tula ay bisig na walang pangingilag
na kumakawit sa iba pang bisig
ang mga tula ay sikong handang masugatan
ang mga tula ay kamay na handang kumuyom
at magtuldok ng kamao sa nilalagnat na langit
ang mga tula ay daliring nangangating
humawak ng bandilang iwawagayway
ang mga tula ay dibdib na may pusong matibay
at hiningang matatag
ang mga tula ay tadyang na handang mabalian
ang mga tula ay sikmurang handang magutom
kung kinakailangan
ang mga tula ay baywang na gumigiling
sa awiting mapagpalaya
ang mga tula piraso ng lamang magbibinhi,
magpapabunga ng laksa pang mga tula
ang mga tula ay hitang handang malatayan
ng pasistang katunggali at handang bumawi
ang mga tula ay tuhod na handang magasgasan
ang mga tula ay binting hindi mapapagod sa lakbayan
ang mga tula ay alak-alakang sanay mapawisan
ang mga tula ay sakong na walang gumamela
ang mga tula ay daliri sa paang walang paki sa paltos
ang mga tula ay talampakang nangangating
maglagalag at handang bagtasin ang tagumpay
ang mga tula ay laman, at buto at isipang
inihulma sa tunggalian.

Huwag Mong Ipamamaraling Makata Ka

Huwag na huwag mong ipamamaraling makata ka
Kung ang hinahabi mong mga salita’y panay Putangina!
Kung ang konsepto mo ng pagtutulad ay panlalait
At ang ideya ng metapora’y walang saysay na galit.

Huwag na huwag mong ipamamaraling makata ka
Kung ang nabuong mga linya’y yabang lang na talinghaga
Kung naniniwala kang tula na ang tugma’t sukat
At kapag nabasa namin ay—Aba! Syet!—golpe-de-gulat.

Huwag na huwag mong ipamamaraling makata ka
Kung ang layon mo ay kasikatan at kumita ng pera
Kung makilala lang at makapagpablis ng aklat
Na mamahalin ang papel at may poetic na pabalat.

Huwag na huwag mong ipamamaraling makata ka
Kung nakilala mo lang si Balagtas sa Florante’t Laura
Kung di pa nababasa si Amado V. Hernandez
At kay Andrew E. ka lang naaakit, Ayayay! Putrages!

Huwag na huwag mong ipamamaraling makata ka.
Kung hanggang papel lang ang de-kalibre mong mga salita
Kung tingin mo sa makata’y endorser ng brief’t panty
At ang tula ang siyang key; Lintik! mas bagay ka sa PBB.

R.A. Syndrome O Sa Makatang Dating Crimson Red Na Naging Yellow Submarine Ngayon

dating simbigat ng dakilang kabundukan,
ng Sierra Madre, ang mga salitang
umaalpas mula sa dila at isip
patungtong sa tadyang
ng papel,
ang makatang umindayog kasama
ng mga punglong nagdadaplisan
at mga matang nanlilisik
na lumulusaw sa tapang at tindig

ay nag-alsabalutan
at inabutan
ng paghinog ng metapisikang-tulang-
out-of-the-blue-na-nangangaral-na-walang-
tulang-makapagliligtas-ng-daigdig-kaya-nga't-
wala-dapat-politika-bagkus-ay-pure-philosophy-
mingling-with-Kepler22b-and-vastness-of-the-
universe
--na lumulon sa kanyang dating tikas,
as well as
ng dignidad at prinsipyo

kasalukuyan siyang naninilaw
at kumakain ng sariling muta,
very cool na mga salita.

Tag

alam mo po,             gusto la'ng

                  naman po kasi     kitang              i-

              tag

gusto ko po kasing mabasa      mo

    ang bago kong gawa/likha/lalang/hinarayang

                tula       

gusto kong malaman mo po               ang laman ng isip ko at kung

paano kong gustong iparating          sa iyo/sa inyo/at sa kanila

ang gusto kong iparating                  wala po akong workshop

                      wala po ako sa creative writing program

                  gusto ko la'ng po talagang

                      tumula

mahilig po kasi akong tumula

                        at mahirap kasing maglathala ng aklat

kapag wala kang pera di ba? di ba? di ba po? kung hindi bahaw na kuwela  

o nanggigitata sa pag-ibig o tungkol sa white lady/tikbalang/tiyanak/duwende atbp.

o 1001 Ways to be This-and-that atbp.

             wala ka

            o kung wala kang spark o kung anumang tinatawag nilang dahilan

               hindi ka papansinin

ng Anvil/Visprint/Girraffe/Milflores/UP.ADMU.DLSU.UST Press atbp.

     pwede kang ilathala ng Psicom/PHR         pero     hindi ka babasahin

hindi ka seseryosohin ng mga      nabanggit   di ba po?

                                    ng akademya      

hay naku! ang akademya po,                naku po, ang akademya!

          pero        po

       di naman lingid sa iyo di ba? di ba? di ba po?

na naninilaw na ang mga filipiniana sa NBS 

                       maalikabok pa nga

    maliban sa salansan nina Bob Ong at Eros Atalia

            nakita mo po?               wala pa ring bumibili ng aklat

                              ni Ildefonso Santos (Sa Tabi ng Dagat at iba pang tula)

pati iyong Ibong Mandaragit ni Ka Amado po

              iyon ding Ginto ang Kayumangging Lupa ni Doming Mirasol

at isama mo na po iyong kay Rogelio Sikat,          Dugo sa Bukang Liwayway

           at ang maramingmaramingmaramingmaramingmaramingmaraming

marami pang filipiniana

                na kahit sale na,         wala pa ring gustong bumili?    bakit?

kaya nga ita-tag na la'ng                       po    kita

            at dito na la'ng                            po  ako                       sa Facebook

                                               (dito may pisoNet sa'min)

                                      tutula

pakibasa naman po,              o kahit hapyawan mo na       la'ng        (please?)

kunwari ila-

                            like mo like mo like mo like mo like mo like mo     po

                                         pampataas ng kompidens ko  

      (baka po may comments ka, meron po ba?)

basta, ang like po ha?

iyong madami ha?

                            share mo na rin                                   gusto ko kasing mabasa

idol kasi kita. :)

Sining Din Ang Pagbubunot

Ikaskas nang may tamang diin ang bunot
sa nakasimangot na sahig: pulang semento
man o tablang kahoy. Kailangan ng kadensa
ng nangagalikabok, tadtad-yapak na sahig;
parang mga daliring nakadiin-sulat sa papel,
kailangan mong panatilihin ang aliw-iw.

Kaliwa man o kanan, ang paang wala sa bunot
ay kailangang sapinan ng basahan
nang di mamakat-sugat sa sahig ang dibuho
ng talampakang namamawis; tulad ng tulang
malalim pa sa Mariana o mas abstrakto pa
sa kanbas ni Picasso, alisin sa tula ang kunot
sa noo ng mambabasa, sapagkat ang tula'y
marapat magpakintab ng sandaigdigan.

At sa huling hakbang, kung makintab na't
maari nang manalamin, huwag ipagkait
sa mga paa ang isang malinis na sahig.
Hayaang muli itong dampian ng nakangiting
talampakan; tulad ng tinapay, huwag ipagkakait
ang tula sa madla.

Writer's Block

ang sikdo ng mga titik na nagdaragsaan
sa utak at daliri, magalak kong pinagtagpi-tagpi
nang unti-unti, bago ilagak itong mga susunod
na salita'y ikaapat na linya lamang ang mapapala

Blanko

boring ang white screen

endless titig

waiting sa muse para kalabitin

ang creative side ng brain

unti-unti

parang  langgam na nagsusulputan

sa puting buhangin ng asukal

sa boring

white 

screen

ang mga letra

at bantas

non-sense tumula nang tula

                            lang

common-sense

"para kanino?"

mankind is a piece of shit

how about humane, humankind

sangkatauhan?

the great planet earth

white boring screen/space

space is black

war!

peace! 

             enough! ENOUGH! ENaf!

kindness please, 'tol!

tula

la.

Ang Makata Sa Panahon Ng Barbel, Gel At Abs

Ano’t ipinagtataka mo ang lambot sa aking buto?

Lanta ang kalamnan ko sa away at basag-ulo.

Wala sa aking bisig ang lakas ng matipuno.

Hindi ako ang tipong layon ng kung sino.

Malakas lang ako, minsan, sa toma at huntahan,

Ng kung anu-anong may kinalaman sa lipunan, panitikan.

Na ika nila’y lumang tugtugin, wala nang kapararakan,

“Susmaryosep, kauubusan lang ng laway! Kahabagan!”

Hindi ako mahilig sa polo, sa slacks, sa gel.

Hindi rin sa gym, sa treadmill, sa sit-up o dambel.

Madalas gutom, pinakamadalas puyat kaya minsan payat.

Aba, ikaw ba naman na ang salita’y dinidildil, ginagayat!

Hindi ako kukuyugin ng mga babaing humahanga

Sa pandesal na nagsulputan sa tiyan ng artista.

Wala sa akin ang biyaya ng Adonis na, rockstar pa.

At wala ring ngiti ng makisig na prinsepe ng prinsesa.

Ano’ng pinagkakaabalahan ko? Magbasa, sumulat ng tula.

Ano kamong nakukuha ko? Maglaboy, mag-isip, tumulala.

Kung hihingin ng panahon, makasasayaw ako sa bubog

Mga salita kong mahahabi sa digmaan ihuhubog

Huwag, huwag mong susubukin ang aking pisi,

Kaya kong hawakan ang emosyon mo’t kiliti.

Matapat ang mga metapora, mga tayutay kong to be.

Kaya kong pamukadkadrin ang bulaklak na iyong tinatangi.

Bigyan mo ako ng isa, dalawa, tatlo—A! laksang mga gabi,

At makikilala mo ang lantay na pag-ibig sa mga tula ko’t labi.

Ang Akala Nila

     may pata sa karapatan

kaya't ganoon na lamang

kung pagpiyestahan

     may alay sa kalayaan

kaya't ganoon na lamang

kung paniwalaan

     may hostess sa hustisya

kaya't ganoon na lamang

kung i-molestiya

      may ari ang sarili

kaya't ganun na lamang

kung maglandi

      may friendship sa prinsipyo

kaya't ganun na lamang

kung manggoyo

     may panini sa paninindigan

kaya't ganun na lamang

kung ipag-ipitan

     ang makata ay takam,

mali, sila ay katam:

kinakaskas ang salubsob

parang karpinterong paham.

Ars Poetica Ng Makata Sa Karsel Ng Sarili

...Parang mga makatang labis na naaaliw sa pagkatula ng kanilang tula at walang pakialam sa damdamin at pag-unawa ng mambabasa. --Reuel Aguila

                    (aaminin ko,                oo,  minsan

oo, minsan,               wala akong

pakialam               sa damdamin

at          u     na         wang u       mu     nawa           ng  mam

                   ba

               ba

          sa

                              bagsak sa pamantayan ko           ang kanilang 

kakayahan na              umintindi, intindihin

ng         ,ang              

metapora, simile,                            paradox, irony

             prosody: metro         ritmo            intonasyon

mga pantigan at patnigan

tetrahexaiambicdactyltrocheeanapestspondeepyrrhic

    tugmaan          ballad villanellle          oda soneto        

                         jintishi haiku tanka

ghazal             bersolibre

assonance              consonance    aliterasyon

   estropa      couplettripletquatrain

hindi nila ito magagagap             bakit ko ilalantad         sa kanila

ang aking nalalasahan          ni nadarama            nakikita      ni

nalalanghap         

                      indibidwal at personal ang lahat          lahat

sa akin             

                      may musa akong pinagsisilbihan     

ano pa't                naging          makata?

                   ang tula ko'y               tula       at tula

lamang 

               wala akong pakialam. walang makikialam.

                            ...for art's sake!)

Palalim

ayaw nang tumula ng tula
tulad ng dati (hindi ko alam kung
ng o nang ang gagamitin ko sa tulad
__ dati) nabasa ko ang salvaged poems
ni eman, lumitaw sa pagitan ng mga pahina
ng maikling kathang tagalog nina AGA
ang isang maliit na anay, ayaw nang tumula
ng tula tulad ng/nang dati. sabi ni pia,
lutang ako, at ano nga ba daw ang balak ko.
alam na niya ang sagot. kanina, naglakad
sa kuwarto ang patikim ni mark angeles, naka-
ipit sa libro ang regi. form ng kapatid kong
red warrior, 20,000 mahigit. naiiyak ako.
katatapos ko lang magkape kasabay ng saging.
nakatapat sa akin ang bentilador at mag-isa lang
akong nakatapat sa blangkong espasyong
nakadamit na puti. ayaw nang tumula ng tula,
tulad dati, nasa bayan ang tula. hinihingi na
ni jack ang bukowski niya, akin na ang angina
pectoris. nasa bayan ang tula, dapat.
ngayon, tulala akong nagpapanggap na tumutula.
nakasilip sa salansan ng mga libro ang
kung baga sa bigas ni pete lacaba. nasa bayan ang tula
tulala ang bayan. ibalik sa mamamayan, kung ang tula
ay pumpon. nagsasala-salabat ang mga salita.
tulad ng/nang dati, hinahanap ng sarili ang kanyang
kahulugan at katuturan. tumutula ang tula, nasaan ang bayan?
tula/d ng makata, tugma at sukat, hindi mapagtugma
hindi masukat hanggang ngayon. tulad ngayon
malalim kong tinutunton ang gusto kong ilantad.
nasaan ang bayan? nasaan ang tula? tulad ng/nang
dati, gusto kong tumula/sabayan. sa bayan.
sandali, humabol sa mata, kung tuyo na ang luha mo
ni AVH. wakas.

Kung Ita-tag Mo Sila, Makikilala Kang Makata At Sisikat Sa Tula

siyento-porsyento, garantisado     makakukuha ka

ng mga mata at daliri at makaiintindi     sa

tula mong tumatalakay sa alienation     at sa kailaliman

ng soul at ego at ng angst at metapisikal     something

ng malalalim mong tugmaan

proseso: itaya mo muna ang hiya,     umangkas

sa balikat ng namamayagpag na makata sa FB

add as friend    hintayin mong makilala ka niya     then

penetrate his/her world, virtual world  tandaan mong tulay 

ang kaniyang pangalan      kilalanin mo ang kaniyang kaibigan

add them      as a friend     at matutong mag-tag

tag-tag-tag-tag-tag-tag-tag                        i-tag          

                          ang tula mong nakangiti

at nagsasayaw sa hangin ng ilusyon at ma    hika            wait a minute

like is like a likeable thing

     aangat ang   ego at ang     angst at ang        confidence mo

makakainuman mo ang iyong mga     iniidolo     inside the literary scene

ng Philippine Pilipinas Pilipino Filipino

malaki ang chance      waiting for godot     masusungkit mo

ang grandest ever award     basta't tandaan     alisin mo muna ang hiya

walang hiya-hiya at delikadesa at kung anu-ano pang dahilan

upang mapigilan kang mamayagpag                  hello hello hey hi

ang tula ay kahalihalina    kung ihahain sa kailaliman ng lupa 

at itatabi sa      kepler 22b      ang tula ay tulay na tuluy-tuloy sa tuluyang

like     like      like is like a likeable thing

kung matututo ka lamang mag-tag

babasahin ka    di nga    comments and suggestions     positibo

negatibo      kakatamin ka        yeso ba o marmol      narra      pa

                                                   lo                   tsi                       na

siyento-porsyento, garantisado     makakukuha ka

ng mga mata at daliri at makaiintindi     sa

tula mong tumatalakay sa alienation     at sa kailaliman

ng soul at ego at ng angst at metapisikal     something

ng malalalim mong tugmaan

              manalig

naghihintay ang                                                     stardom.

Maitatago Sa Kasiningan Ang Kawalang-katuturan

kung ngingiti ang tinig
makikita ko ang akit
ng matikas na sakit
ng ginusot na gusto
malapit ang pilat
sa ganting di matinag

kung nasasaan ang nasa
nag-uulat ang tula
nagdudumilat ang dalit
hinuhulaang lumuha
ang bigting tigib
sa anas ng sana

kung mapalad ang malapad
na pakpak na kinapkap
sa ngiting walang tinig
ubos ang subo ng bagsik
bibigkas tayo sa kawalan
lawak sa kipot ng pagpikot
sa oral na laro
ng salitang tinulis
sa sulit ng kipit
na pagpikit.

Patricide O Sa Ibabaw Ng Bangkay Inilalatag Ang Tula (Pasintabi Kay German Gervacio)

Gilitan ng liig ang mga nuno't idolo.
hangga't maaari, ataduhin maging buto.
Huwag hayaang makagulapay pa,
tarakan ng kandila, kanilang sintido at baga.
Paputlain ang kanilang labi, katasin ang dugo
parang kalamansi. Ang utak at puso
tadtarin at ipulutan. Magbarik, iikit ang baso,
sa harap ng kanilang dakilang bangkay
ating ihahantad ang ating tagumpay.
Sa ibabaw ng bangkay inilalatag ang tula.
Ang pagkitil ng Ama ay 'sang dakilang pasya.