Biyernes, Abril 22, 2011

KM64: "PALAYAIN SI ERICSON ACOSTA! PALAYAIN ANG LAHAT NG BILANGGONG POLITIKAL!"

Ito ang pahayag ng KM64:

PALAYAIN SI ERICSON ACOSTA! PALAYAIN ANG LAHAT NG BILANGGONG POLITIKAL!





















Gusto mo ng sample ni Ericson Acosta? Ito, pakinggan mo:

Walang Kalabaw Sa Cubao

Astig di ba?
Suportahan natin ang pagpapalaya.
Muli,

PALAYAIN SI ERICSON ACOSTA! PALAYAIN ANG LAHAT NG BILANGGONG POLITIKAL!

Tanong*

naghintay ako, hinintay
itong pagkakataon
na ang tugon natin
sa pangangamusta'y
singgaan ng mga ulap
sa bughaw na langit

oo, hinintay ko,
pinahupa ang mga ulan
na itinakwil ko noon
dahil sa alat at pait
na itinakwil ko
'pagka't mga sundang-na-saksak
silang sumasaksak
sa aking dibdib

pinahupa ko ang ulan
tulad nang kung paano
ko tiniis na taluntunin--
kahit may mga bubog--
ang mga lansangan
na iniwanan mo ng bakas

sinikap kong magpinta
ng araw
sa pisngi ng mga gabi
sa mga umaga, umukit
ng ngiti
lumikha ng distansiya
sa pagitan ng pagtanggap
at dalamhati

napagtagumpayan ko
ang lahat

ngayon, nag-uusap tayo
na parang hinehele ng paligid
at tulad nang dati
musika pa rin ang iyong tinig

may tanong lamang ako:
ito ba'y ganap nang dulo?
na ganap nang nagsara
ang mga pinto
at magbubukas ng pag-ibig
sa panibagong daigdig
o
mali ang pagkamuhi ko
sa kapalara't pagtatakda?

sagutin mo:
babalik ka ba?


Takyaran

Yakap ko siya
ang matalim niyang kabuuan
malamig
maligalig
ang tibok ng kaniyang dibdib
nagngingitngit
nagngangalit

kung sakali ma't
maghiwalay ang aming
ngayon
isa lamang ang aking ikahihinahon:

mapalaya niya
ang kaniyang silbing
magpalaya--
gilitan ng leeg
silang ganid at nagsasamantala.

Kung 'Di Mo Man Ramdam Ang Lukso Ng Dugo

Sa lagusan ng aking sidhi
sumulak
iyong uha.
At matitiyak ng aking palad at ugat,
sa pusok ng puson
naglandas
iyong inunan.
Sa salimuot ng aking bulbol
sumibol
bumbunan mong hinihintay ng dunong
at 'di ko itatakwil,
na mula bayag ko naglayag
patungong estasyong-hima
ng iyong Ina,
bata-batalyon, hukbong may iisang layon.

Habang tinititigan mo
putlain, lipas ko nang anyo, walang damdamin, walang lukso--
pinagigitnaan tayo ng pagkakamali't pagkukulang--
huwag mo sanang igiit na ako'y hindi mo Tatang,
na ang kasalukuyan mo'y walang kahapon.

Hanggang paruruonan
ititiyak kong ikaw ang aking kaganapan.

Nahimlay ako.
Ngunit 'di ako namatay.

Tulang Nalikha Sa Pagitan Ng Langit At Lupa

Iniwan ko Lobo, ingatan mo sana,
aking pusong mawawalay sa tinanging gunita.

Minsan lamang
sa laksang segundo
nitong nagsamanhid
na hininga
nakakilala ng tulad mo, Lobo.
Minsan lamang
hinaplos ng rikit,
ng payapang haplit
itong aking sariling
tinubog sa lusak ng hapdi.
Lobo, tinuruan mo
akong matutunang pakinggan ang katahimikan.
Tinuruan mo akong kilatisin ang kaibhan
ng langit sa lupa, ng lupa sa dagat, ng dagat sa langit.

Lobo, iniwan ko sa iyo,
isang tinatanging alaala.
Babalik ako,
kung itinadhana.

Di Mo Malilimutan Ang Kanilang Pagsisimula*

i.
akalain mong inabot pa
ng isang siglo
iyang pagkatas mo ng dugo

paglikha ng kung anu-anong produktong
ipinamumukhang kailangan
ng mamamayan

gayong bago ka umusbong
may gatas na ang ina
may tsokolate nang tableya
may kape nang barako
may asin na't paminta
na nilikha ng mariringal nilang mga kamay
na sila'y mabubuhay kahit ika'y mamatay

ii.
akalain mong inabot pa
ng isang siglo
iyang pagkatas mo ng dugo

pag-awas ng mga sagabal sa tubo
ang mga katulad ni Diosdado
"Ka Fort" Fortuna, isang lider-manggagawa

iii.
aakalain mo bang 'di na aabutin pa
ng isang siglo
ang iyong pagbangon?

bukas-makalawa
saklot ka na't kubkob ng unyon


*Alay sa Isang Siglong Taon pagdiriwang ng Nestle. At ayaw na naming madagdagan pa.