Pamatid

Hayaang lumangoy sa lusak
ang mga kangkong
pahintulutang umusbong sa tabi-tabi
ang mga talbos
pakapitin sa buhaghag na lupa
ang mga kamote
pasulputin sa naghambalang na tae
ang  mga kabute

silang araw-araw naming nginunguya
ninanamnam, nilalasap
bigyan sila ng pagkakataon
ang umano'y karaniwang latak
ng kalikasan at panahon
bigyan sana sila ng pagkakataon
sumilay sa kanilang kaganapan
pagka't sila ang sa ami'y nag-aahon
kaligtasan sa gutom
at kamatayan.