Patricide O Sa Ibabaw Ng Bangkay Inilalatag Ang Tula (Pasintabi Kay German Gervacio)

Gilitan ng liig ang mga nuno't idolo.
hangga't maaari, ataduhin maging buto.
Huwag hayaang makagulapay pa,
tarakan ng kandila, kanilang sintido at baga.
Paputlain ang kanilang labi, katasin ang dugo
parang kalamansi. Ang utak at puso
tadtarin at ipulutan. Magbarik, iikit ang baso,
sa harap ng kanilang dakilang bangkay
ating ihahantad ang ating tagumpay.
Sa ibabaw ng bangkay inilalatag ang tula.
Ang pagkitil ng Ama ay 'sang dakilang pasya.