Lambitin*

At isasakdal ng mga kinauukulan

si Isaac Newton,

nguni't hinding-hindi si Lucio Tan

at ang kaniyang kumpanyang Eton.

* But under the contracting arrangements, the direct employer of the construction workers is the contractor, not Eton Properties. The question now is, who will be reprimanded and who will be accountable for the workers’ deaths?

This early, Eton claimed that it has nothing to do with the “freak accident.”

--Bulatlat.com

Manhid Ang Bato Nguni't Hindi Ganid

minsan, pinakaiisip mo:

para saan nga ba

ang ilang naghambalang na bato?

sa lansangan, sa eskinita, sa kanto

ano ba ang pakinabang

ng batong binaog ng lamig?

napapatid ka nito

sagabal minsan sa pagtakbo

kung titipunin, hindi naman nagiging ginto

hindi rin kaaya-ayang pang-ornamento

ano nga ba ang silbi ng bato?

mas mainam ang lupa kaysa semento

hindi naman nagkakaanak ng gulay o puno

minsan ka pang madudulas dahil sa lumot na namuo

at kung minalas ay mababasag pa ang bungo

ano nga ba ang silbi ng bato?

alam kong alam mo

na wala nang titigas, titibay sa bato

kahit tinatanong mo ang silbi nito

walang gusali kung walang semento

maalikabok ang daan na hindi aspaltado

totoong matibay, bagama't manhid, ang bato...

at alam kong alam mo

sintigas ng bato ang iyong galit

'pagka't ang iyong barungbarong

ay mawawala sa isang saglit

wawasakin ng mga demonyong ganid-manhid...

a! hawakan mong mabuti't mahigpit

ang batong manhid ma'y hindi ganid

batong nilalamig ma'y iyo ring magagamit:

ipunin ang iyong galit at lakas

sa kamaong pinatapang ng hirap at dahas

ipahalik ang palad sa magaspang na bato

unti-unti mong iangat ang nagsugat na kamao

lumikha ng distansya, kaunting buwelo

at saka buong tapang't layang paigpawin

ang tagumpay sa tulong ng umaapoy na bato.

Mula ang larawan ka y Kathy Yamzon

Teargas

matagal na kaming hinubog ng hirap

itinubog kami sa dusa at sadlak

pinanday kami ng lipunang marahas

handang lumaban, humawak ng tabak

at kung aakalain n'yong kami'y mapipigil

ng isnayper, transiyon at tirgas

a! isinangla na namin aming puso at lakas

sa barikadang 'di pagagapi't magwawakas...

Mula ang larawan kay Kathy Yamzon

Ayon Sa Kasaysayan

ayon sa kasaysayan

kumpol ng maliit na isla

ang dating sakop ng Mendiola

libingan ng mga lakan

at bayani

ang dating maputik na sakop

na nang lumao'y

tinirikan ng lupalop ng kaharian

ng mga sugapa sa kapangyarihan

ayon sa kasaysayan

dito sumiklab ang maraming labanan

dito naitanim ang maraming kamatayan

ng mga magsasaka

dito naukit ang maraming karahasan

sa mga estudyante't aktibista

dito kung saan patuloy na umaawit

ang musika ng protesta

ayon sa kasaysayan

kumpol ng maliit na isla

ang dating sakop ng Mendiola

naging libingan ng mararangal

at sang-ayon sa kuwentong ito

ng kasaysayan

dito uusbong ang ganap

na kalayaan

dito kung saan iniuukit

ang makauring digmaan

Mariana

kung singlalim ng Mariana

ang iyong tula

nabubuhay sa metapisika't hiwaga

nakatago ang puso sa ilalim ng lupa

                                                         tiyak

mamamatay nang tulala

ang sino mang mambabasa

malulunod sa nagdilim na talinghaga

itinago nang husto sa ilalim ng lupa

Marahil Nagtataka Ka Kung Bakit

Marahil nagtataka ka kung bakit

ang palad mo, sa lahat ng bahagi ng iyong katawan,

ang paborito ko.

Hindi ang iyong mga hita, hindi ang pagod na mga binti.

Hindi ang iyong makurbang baywang na nirarayuma gabi-gabi.

At hindi rin ang natutuyo mong labi na nagsasaboy ng ngiti.

Hindi ang iyong bilugang mga mata,

at ang mga titig nitong mapagkalinga.

O ang iyong manyikang mga paa

na 'di na naipapahawak sa manikurista.

Marahil nagtataka ka kung bakit,

at madalas nga akong tinatanong nang pilit.

Kung bakit nasa iyong palad ang aking pananalig.

Kung bakit hindi sa iyong noo o pisngi ako humahalik

tuwing lilisan upang maghapong tumalik

                                                     sa araw na tirik.

Kung bakit hindi sa iyong noo o pisngi ako humahaplos

tuwing darating na hapo ang katawang iginapos

                                                     ng ating paghihikahos.

Kung bakit sa tuwinang magkasarilinan tayo

ay pilit kong binabagtas, gamit ang mga kuko,

ang bawat gatla sa iyong palad.

Huwag kang magtataka, mahal, iyon sana'y iyong nauunawa.

Mahal, sa iyong palad ako nananalig.

Diyan tayo unang nagniig.

Ikinulong ng palad mo at ng akin ang hangin ng pag-ibig.

Ang ilang mga peklat at bakas ng naglaho nang kulugo,

ang pasma, pawis at kumakapal na kalyo

ay hindi pumipigil sa patuloy kong pagsuyo.

Ang palad mo ang sumasalo sa tagaktak kong pawis.

Gamay ng mga palad mo ang kalbaryo't pagtitiis.

Iyan ang humahaplos at sumusuri kung nilalagnat ang iyong mga mahal.

Walang sawang kumakalinga kahit napapagal.

Ni hindi ko natikman diyan ang lumilipad na sampal.

Mahal, huwag kang magtataka.

Ang palad mo ang aking buhay at musa.

Diyan ko hinuhugot ang aking hininga.

Hindi ko ipagpapalit sa mga katawang hubad

ang iyong walang-kaparis na mga palad.

Ang iyong mga palad  ang pangarap kong natupad.

R.A. 6713, Section 4, Paragraph (h)*

ngayon mo pangatwiranan

na may tuwid ngang daan

sa bayan na itong inyong pinagpapasasaan.

ngayon mo panghawakan

na kami ang "Boss!" na pagsisilbihan

ng estadong singkarakas ng nagdaan.

ngayon mo patunayan

ang adhika umano ng kabayanihan

ng mga magulang na santo daw ng bayan.

ngayong nag-liliparan, papaimbulog sa kalangitan

ang pag-asa't hininga ng simpleng mamamayan.

ngayon mo pangatwiranan

na ang porsche'ng iyong ipinangalandakan

na wika mo'y mula sa sariling bulsa't kaban

ay hindi inani sa madugong tubuhan.

*(h) Simple living. - Public officials and employees and their families shall lead modest lives appropriate to their positions and income. They shall not indulge in extravagant or ostentatious display of wealth in any form.