labindalawang uri ng bilog na prutas
hanapin at ihain sa hapag
polka dots na daster, tisert o kamiseta
ilapat sa balat bago maglipat taon
pupuwedeng pulang damit kung walang polka
good karma raw ang hatid
mag-ingay: torotot, kawali, tambol
tanggal malas, demonyo'y malilipol
pinakamasaya ang magpaputok
super lolo, plapla, paybistar, pikolo
bawang, sinturon ni hudas, watusi
sawa, wiselbam, fountain, kuwitis
at isang goodbye Philippines
sa usok at dagundong at alulong
na magmimistulang frontline ang paligid
at aakalain mong ika'y nasa ulap na't langit
maging si beelzeebub at behemoth at lucifer
ay di mangangahas na lumipat-taon
magsuot din ng mga lucky gems
mulang kalusugan hanggang libog ng katawan
siguradong nasa ayos ang lagay
sa basbas ng batong mahiwaga't singmahal
ng kotse at mamahaling damit pangkasal
huwag kalilimutang tumalon nang mataas
iyong tipong limang minuto bago ka lumapag
tatangkad ka't tatatag
maghagis din ng barya't ipaagaw
nang ang darating na suwerte sa iyo'y nag-uumapaw
magsabit ng bigas at bulak sa pinto
solb ang pagkain sa buong taon...
iyan ang iyong mga gagawin bago maglipat-taon...
tradisyong walang liban sa bansang dayukdok
at patuloy na ginagatasan, nabubulok...
Walang komento:
Mag-post ng isang Komento