nakapinta pa rin sa bubungan
ng aking gunita ang mga sandaling
pinahinto natin ang daigdig.
alam kong ganap mo ring naaalaala
na umaambon noon, at hawak-kamay,
iginupo natin ang tulay sa ating likuran
at walang alinlangan, pasulong
ang lahat ng ating hakbang
at ihahakbang.
nakapinta pa rin ang lahat.
singlinaw ng awiting sabay nating inawit,
singlinis ng mga hangarin na ating hinabi.
marami pang sandali
ang ipipinta natin sa mga kanto,
sulok, sa lansangan, sa bangketa
ng masalimuot nating daigdig. hawak-
kamay tayong magsasaboy
ng bahaghari ng ating pananalig.
Walang komento:
Mag-post ng isang Komento