huwag mo akong aalukin ng kung anumang
laro na kinahihiligan mong tikladuhin at
dilat-mata, tangina at shit at tsktsk mong
kinakausap. huwag na huwag, kaibigan
kong birtuwal; hindi ko hilig damitan ang
nilalang na di ko mahahawakan, o bumuo
ng mga blokeng di ko mababasag, o ng
mga digmaang kay kyut kung pagmasdan,
o pagtataguyod ng siyudad na walang
barungbarong at DPWH projects. hindi ko
dinedekorasyunan ang pagkaing di ako
mabubusog, di ako nakikipagbarilan nang
putok lang at walang basyong lalapag
sa aking paanan. kaibigan, wala akong
panahon para diyan. alukin mo ako
ng iyong tula o ng paglalaro mo sa pagitan
ng barbed wire at truncheon. alukin mo
ako, ng iyong kuwento o ng larawang
nagtatambad ng tinatamad na pinuno.
huwag lamang ng mga larong hinding-hindi
maipapantay sa luksong-baka at patintero.
Walang komento:
Mag-post ng isang Komento