magugulat ang lahat
ihahayag sa lansangan
ang lahat ng ayaw nating marinig
ilalatag sa daan ang mga bangkay
ng mga inagawan ng hininga
mula't sapul ng kasaysayan ng protesta
mapupuno ang lansangan ng mga paa
ng mga kamaong tumutuldok sa hangin
umaawit ang paligid, makapanindig
kasama ka sa lahat ng ito
hindi ka kailanman makahihindi, makalyo
ang iyong palad at talampakan
iisa ang mga ugat natin, kung magbukal
na ang daluyong ng himagsik, kawit-bisig
tayo sa pananalig, iisa ang ating hininga
lilikha tayo sa dilim
ng umaga.
Walang komento:
Mag-post ng isang Komento