Habang Pinagmamasdan Ang Punong Di Alam Ang Ngalan

pinitpit na mga tanso,
pustura't kulay ng mga dahon
ng punong di ko alam ang ngalan.

nagsasalit
sa luntiang mga dahong
tantiya ko'y bagong usbong.

mayabang sa pagkakakapit
ang mga lunti, samantalang
nangangalaglag ang mga tansuin

sa ragasa ng hangin;
parang buhay, isang paligsahan.
naisip ko lamang kung alin at sino

ang hinirang--ang mapalad;
ang nauna o naiwan
o ang punong huhubaran

ng taglagas.