paano kakausapin ang talampakan
kung hapit sa lakad at ayaw panawan
ng atubili?
wala itong pakialam sa lawit na dila,
sa tagaktak ng pawis na kumislap-mawala
sa dugyot na hapit ng nangutim na kamiseta
sa laglag ng balikat, sa tirik na mata
tugunan lamang ang kati't pagnanasa
na tuntunin ang bakas
ng iyong hininga.
nariyan ka ba sa bitak ng pader
o sa gilid ng bangketa, sa daster
ng aleng tila wala yatang mukha?
nariyan ka ba sa butil ng asukal
ng bananakyu o sa mata ng bangaw
na tinampal ng dalaga? naririyan
ka ba, naririyan ka ba?
paano kakausapin ang talampakan
at sasabihing milya-milya ang pagitan
ng ating panambitan?
Walang komento:
Mag-post ng isang Komento