Hari ka ngang walang trono o putong ng koronang
itinakda ng linya ng ugat o ng matandang ama
na namemeligro sa sakit, sa ma-adornong kutson
sa isang grandiyosong silid ng engrandeng kaharian.
Hindi ka hari sa palalo o bohemyo nitong kahulugan.
Pagkat itinakda ka ng mga nasasalat at nasisilat
sa ulam at kumot, yaong mga sinisinat
ng kawalan.
Hari ka ngang walang dapat ipangalandakan
at hindi mo na kakailanganin sa iyong paglisan
ang pagkilala ng mga naghahari-harian sa lipunang
dinayukdok nilang sinasakop-lamunin
mga laman, utak at buto ng mga nasasalat
at nasisilat; maging ang lupa, karagatan at bulaklak
nitong paraisong hindi kanila.
Hari kang itatakda ng kababaang-loob at halakhak.
kay Dolphy
Walang komento:
Mag-post ng isang Komento